話晒我部Baby GIOS都算roadbike，都係時換對Lock踏喇！留意很久，喜歡意大利的LOOK Keo lock pedal，旺角同榮是代理LOOK同SIDI的，唯有出去同榮一趟。用lock踏自然要穿lock鞋，選上SIDI T2三鐵lock鞋是因為靚。Lock踏好用之處便是雙腳和單車傳動緊密連結在一起，這樣可以將下踏、上提、前推、後拉全部力量給充份利用也不怕雙腳劃圓時踏空腳引致受傷。但可怕之處也正是既要上鎖那自然要解鎖吧，一旦停車時沒脫出的話，哈哈～連人帶車訓街吧！解了右腳但車子重心向左的話，哈哈～連人帶車訓街吧！上斜不夠力定了捍的話，哈哈～連人帶車訓街吧！所以沒有初用者能逃過訓街的魔咒，用lock踏的大家心裡都默念著我用緊lock踏～用緊lock踏～用緊lock踏～吾脫卡死梗！！
SRAM既RIVAL剛轉左款，升級左STI鎗手用carbon同成set轉左黑色，奇怪～今年興黑色件咩？今年Shimano套105又係轉用黑色的。明年2010到SRAM FORCE 轉款，嘩！不得了～全套用鈦灰色，設計跟頂級既RED一樣咁滯，只是變左黑白色調，個拉花隱約見到大Ｆ圖案。我覺得比RED更靚更易襯車，用來襯我部GIOS PANTO應該好正！其實之後都會打算幫PANTO升級，呢套FORCE應該是不二之選，反正吾想用Shimano野。原本巳考慮性價比極高既SRAM RIVAL，但黑色我吾多鐘意。希望SRAM FORCE套Group set吾好太貴，因為呢排Ｄ單車野狂加價，仲有時間比我集下資等佢出！
終於都入手第二部車，這車是二手入購回來的，上手車主三月中買的有單有說明書，佢踩過幾次但巳換了3T drop bar、3T頭頸和3T白色手把帶，THOMSON座位捍和San Marco黑白坐椅，基本上巳幫我襯好黑白配藍，最後還配上原廠漂亮水壼一個。這些以是值幾千元的上等好料，加上8800的車價巳萬多元的精品小跑車，由於車主求售心切，一開價只是9000元我巳食指大動，我多想兩天巳劈價到8000元，第二天早上再改為7500我無法抗拒了敗了他回來，最後7300元收為己有。真係同新車一樣～由於收車是星期五晚上在沙田交易，只好call van帶佢返屋企嚕！
這部GIOS PANTO小輪徑可是我考量很久最想買的車。GIOS香港現在是沒有代理的，所以這車沒那幾間單車店入貨就是，這部是太子bikecity入的，暫時香港應該不多過十部的罕有品種。GIOS是超過六十年歷史的意大利競賽單車老牌，GIOS小輪徑車主要是意大利設計為給日本市場，而車子是台灣主力生產，所以只有設計上是意大利GIOS的血統。騎了Dahon SP8成年，知道清楚下一部要的車要是Roadbike傳動，Roadbike的彎把手，車架還是喜歡鋼架的耐用及吸震性，比20" 406大一點的輪子，但又不想買Roadbike這樣龐大的車子。PANTO正好符合以上的要求，Roadbike鑽石型配以高碳雙抽鋼管車架、澳洲VELOCITY 451小刀式bearing破風鈴配台灣Kenda 1"跑呔、尚算夠用的Full set Shimano Tiagra等級傳動和製動系統，如果用上105級別的十連速會更好！
騎了幾天，Tiagra還算暢順好用，對Velocity刀鈴真是很順滑，3T人體工學drop bar十分好握，平坦路上順著姿體向下keep30km/hr完全無問題，上40km/hr也不太費力我想要向50km/hr進發的話PANTO絕對可以～
有用鍊油同無用錬油，踩踏轉速分別頗大的！之前用開Finish Line Wax，我覺得吾可叫油嚕，基本成份係蠟，滴Ｄ響地下乾左真係一pat蠟黎。呢支黎，用左會好順好靜又吾黏塵，不過效用吾長一日行程貨仔，冬天梗加無料到，果頭落完齊空轉一陣巳經無用。睇番個樽有兩個icon仔，一個太陽同一舊雲，即是陰晴下用連雨天都不能！試下新野Finish Line ProRoad - Ceramically，主成份Ceramic（陶），Ceramic多在單車高階傳動的零部件上大量使用，什麼Ceramic Bearing、BB芯、hub等。Ceramic錬油真係要試下先，天豐買回來60蚊一支。橫掂要洗錬，今次想洗清Ｄ，來個大肢解吧！先拆下後輪，再打開錬條快拆扣，將整條錬用松節水浸洗一下，再用舊牙刷刷一下後飛輪和大餅，wow~新既一樣！重新組裝好後，上油嚕～明顯是微帶黏性既油狀態，比wax的水狀態好落Ｄ，吾會滴晒落黎浪費晒。好空轉一下吧！嘩好感動～比wax更順更靜！Finish Line ProRoad - Ceramically樽上是三個icon，包太陽、雨雲和雪花，好全天侯下喎～希望不會太黏塵啦。
終於都炒番獲，仲要係行過十幾廿次既洪水橋單車徑炒獲金！所以一時大意很高速入一個很急的S彎，巳經轉向不足了就諗住夾硬訓入彎心但給渠蓋凳起左後輪，一收break巳經鎖鈴響呔，跟手派牌成個連人帶車訓街。果下感覺到條腰撞左去行人路條石邊～好痛～！炒完就坐正路邊，隻腳kick住架車咁，呆左～車友問我邊度邊度有無事，我都重無回魂咁。腰背位磨損左，左腳失頭哥少少扭到之外都無乜野大損傷。阿俊在我後面目睹成個過程，佢話見我一派牌想訓果時我巳經放晒手，哈哈！我話我做開特技演員架麻，我諗住一訓低就由架車飛走架麻～睇番條路有成兩米煞車痕，如果我吾煞車可能撞上行人路仲金添。撿查下無乜大礙後就可以繼續去龍門居食飯去，返到屋企睇下塊鏡見到腰背位原來磨得好金下，應該無左忽肉，沖涼果時拿到我丫～今日天氣明顯涼了很多，著左外套踩果時Ｄ風吹到打冷震！阿俊下午著件T恤出去到晚上回來會合我地，所以佢就凍獲金！
上兩個星期日同個車友阿俊由天水圍出發走去大埔，路線就先到錦田由錦田路轉入林錦公路途經林村到康樂園前的轉入大埔公路﹣大窩段便到太和了，林錦公路中途那條1:8大斜路真係羅你命三千～剛換了前雙餅後Roadbike九速超密齒比發輪，但前波變速機沒貨所以出到大埔裝番先用到小齒前餅，後發輪最大先得23T就梗係上吾到呢條黃金斜路！推啦老友～推到上頂都費了大半勁兼狂出汗，戲玉來下坡道同是1:8，下不到一半巳經55km，去到60幾車頭開始吾穩定了，要收掣了～大風吹到眼水都標埋，下坡尾聲諗住轉高波時因為無前波變速機所以甩鏈了。上番鏈踏多一會巳到大埔範圍的林村，我都係第一次去林村，估吾到會係踩單車去呢～那就當然停下參觀一下，古樹被寶帖肆虐得搖搖欲墜，五元祁個福點都幫襯下保個合家平安身體健康啦！
到左大埔都係用左一個半鐘左右，吾係好遠25km度，出來主要目的是裝前波變速機同換後鈴啤呤盒，捷成直頭比左隻新鈴我算～哈哈！整好晒都七點天黑了，趕住回程了，但走另一條路線，由粉錦公路去新田公路番落去青朗公路回錦田，點知原來是會繞大路兼多上落斜，我一時吾留意原來仲未食野，所以中途肚餓到體力透支了，仲有Ｄ想暈同開始失溫！阿俊叫我要頂到加州花園七仔呀，點知突然轉彎見到油站喎～我果刻真係好似見到綠洲咁！即刻沖入去snack shop整左條snacker同利賓納，我未試咁好食既snacker呀！休息一會，待回復正常後再繼續回程到元朗去～到達元朗同阿輝聚一聚之後，我同阿俊再踩去屯門晚飯後就回家了。我諗由天水圍直接踩番馬鞍山阿媽屋企都吾成問題了，可以一試！！
終於在上星期完成第一次外帶小摺遊，先在家樓下乘巴士到沙田會合填飽一下。開始去第一站大埔捷成單車行，基本上大圍沙田大埔馬鞍山熟路得很了，此終以前踩太多了。到了捷成，居然佢入左市面難尋的Schwalbe Stelvio既20吋幼呔，全黑275蚊一條！老闆娘話前後外內呔連裝$580，唉～忍吾住啦！由於係高壓呔所以要換呔塾加＄40。換完成架車個樣跑左好多，即刻拿拿淋走去大美督試車，真係好順好慳力同好好去。由於咪錶要調校過，所以吾知快到幾多，但可以肯定係架車登左～無計因為我架車係硬架，同無左粗呔既吸震能力！輪徑細左所以起圍快真爽。在大美督Tea完就出番沙田禾輋冬菇亭dinner！出到去佢地死咁滯要食完打的番去，咁Chris車埋我去荃灣西鐵站，我就坐西鐵番到天水圍站再踩番屋企。第二日Chris同Alvin話倦到成個廢人咁，我就睡醒乜事都無，如果吾係幼呔我可能都會吾掂。我地咁就一日踩左70公里嚕，老實說沙田大埔Ｄ單車徑好踩好多不但好平順而且很少障礙物又夠長風景又靚！
終於的起心肝買番個摺車袋，係時候去下其他地方踏下。係Yahoo Bid用佰五蚊買的全新Dahon原廠車袋，架車換左SDG i-beam座位同seat通，也換左MKS快拆bearing腳踏都輕左1kg。個bearing踏真係好順同好咬腳，只是有時反轉左底面時要轉番好佢就最咬腳～等條呔蝕得七七八八就可以換埋幼呔，令架車可以再輕Ｄ，磨擦面細左咁架車更好去更省力。星期日預定同阿chris Alvin去沙田踩車去大埔，好耐都無係沙田踩單車嚕，好懷念中學成日踩住架車同班死黨周圍去～買舊brake膠又去大圍，買條迫力線又去大埔，總知濕之娃娃想買都當籍口去踩餐飽！
星期五farewell edmond去左北角渣華道東寶吃晚飯，到過那兒的人都清楚那處最出名不是什麼名菜而是戰鬥碗吧～我們一行廿幾人我想前後叫了廿枝啤酒都有，由於銷情熱烈，由哈爾濱到燕京、喜力及喜士伯都飲過。像是試酒大會似的，不過喜士伯真的幾難入口的，我覺得哈爾濱不錯的！飯後相約好要到Halo大坑新居玩，嘩～硬的來了～！！Volka出場，由於在天台上環境不錯，大家都玩得紅起來！送埋Kato同新同事回來都六點=.=今天起來都兩點了，有點宿醉！見終於出番太陽，好一於騎過車出出汗，先到元朗吃東東先，元朗有很多食肆都在馬路旁的，所以一下車坐下便吃超方便～填飽肚，體力充足四圍踩踩，市中心有時要走馬路但不太危險的，當自己在駕私家車一樣的注意交通情況及駛近路旁便ok！再到昌禕想裝個咪錶看看，老板娘介紹左兩個cateye的Valo5黑色和新版銀色Valo8，都是有線版的。都不過兩佰的選擇，我覺得Valo8較好，因為多了Average Speed但我想要黑色的舊版。老板娘幫我在倉找找，再Call我。昌禕售後服務真的很好，免費Tune車又吾會硬要介紹Ｄ貴野，只會看你的需要真好！之後就回家了，朗屏到天水圍西鐵站那段最好爆，可以上到八波發盡全力去踩。成身汗回到家沖番涼好爽～正
計劃巳久要添置單車終在今日入手完成，下午等我既隊員巨熊Chris入來元朗選購我地愛驅。其實之前我地都研究好是買SP8，點知今日到舖時居然SP9都番埋貨就連首次到港的雙中餅SP16都黎埋～即時令到我地頭痛不而，最後都係價格先決模式選了SP8。我選我最愛的紅色Chris就黑色，佢果部又係新到的磨沙黑，幾靚下又潮可惜番得一部，算可以襯得起我部火紅色SP8啦！放棄雙中餅都係覺得我地都吾多會玩大斜路，真係玩到咁激不如入大車算吧！買摺車一來想慳位，兩來可以方便上大型交通公具帶住佢四圍去踩下咁。今買左車之後在元朗四圍踩，但今日天色不太好，總想下雨似的。最後到元朗新記吃吃雞粥，就踩番屋企收工！暫時兩車都放在我家，首要買個車袋、燈同咪表，之後至改車！今日我同Chris都有試SP9，吾知關吾關SRAM X9事總覺得好踩Ｄ。
